Daşınmaz əmlak bazarında ucuzlaşma bank sektoru üçün ciddi təhlükə deyil- Vüqar Əhmədov

Hazırda daşınmaz əmlak qiymətlərində ciddi ucuzlaşma riski qeydə alınmasa da, bu bazarda potensial qiymət dəyişiklikləri bank sektorunun risk menecmenti çərçivəsində diqqətlə izlənilir. Bu barədə mərkəzi bankın baş direktoru Vüqar Əhmədov bildirib. 

“Əgər daşınmaz əmlak qiymətləri kəskin ucuzlaşarsa, təminatların dəyəri də azalacaq və bu, kredit risklərinə təsir edə bilər. Hazırda belə bir təhlükə müşahidə olunmur,” — o bildirib. 

Maliyyə sektorunda daşınmaz əmlakla təmin olunan kreditlərdəki potensial risklərə baxmayaraq, Mərkəzi Bank bu sahədə ümumilikdə sabitlik müşahidə edir. 

“Hazırkı qiymət səviyyəsində nə kredit riski, nə də təminat risklərini ciddi təhlükə kimi görmürük. Banklar tərəfindən verilən kommersiya kreditlərində də daşınmaz əmlak təminatlı borclar mövcuddur. Qiymətlərin azalması bu təminatların dəyərinə təsir göstərə bilər. Lakin Mərkəzi Bank qeyd edir ki, risklər izlənilsə də, hazırkı mərhələdə ciddi təsir gözlənilmir”, - Əhmədov qeyd edib.

“Əsas məqsədimiz maliyyə sektorunda risklərin minimallaşdırılması və dayanıqlığın təmin olunmasıdır. Biz daim analiz aparırıq, bazar vəziyyətini qiymətləndiririk və lazım gələrsə, qabaqlayıcı tədbirlər görürük,” — o əlavə edib.

Onun sözlərinə görə, risklərin mövcudluğu təbii haldır, lakin əsas məsələ bu risklərin düzgün şəkildə idarə olunmasıdır. Gələcəkdə bazarda baş verə biləcək dəyişikliklər fonunda tənzimləmə alətləri genişləndirilə bilər.

N. Təbrizli