2025-ci ilin martında ərzaq inflyasiyası 6-7% təşkil edib

Martda Azərbaycanda illik inflyasiya 5,9%, baza inflyasiyası isə 4,5% səviyyəsində formalaşıb. Bu barədə Mərkəzi Bankın İdarə Heyətinin Sədri Taleh Kazımov məlumat verib.

“Aparılan təhlillər göstərir ki, illik inflyasiya və baza inflyasiyası gözlənilən intervalda qərarlaşıb. Qiymət artımları əsasən ərzaq məhsulları seqmentində müşahidə olunur,” – o qeyd edib.

Ərzaq inflyasiyası martın sonuna 6-7% təşkil edib. Xüsusilə, bəzi məhsullarda qiymət artımı 7,7%-ə qədər yüksəlib.

Taleh Kazımov vurğulayıb ki, Azərbaycanın inflyasiyasına həm xarici, həm də daxili amillər təsir göstərir. Xarici amillər sırasında əsasən ticarət tərəfdaşlarında baş verən inflyasiya və qlobal qiymət artımları xüsusi yer tutur. Qeyri-neft məhsulları üzrə idxal qiymətləri inflyasiyaya əhəmiyyətli təsir göstərib.

“Məsələn, 2024-cü ildə iqtisadi ticarət tərəfdaşlarımızda illik inflyasiya orta hesabla 11% təşkil edib ki, bu da Azərbaycanda 3,86 faiz bəndi həcmində inflyasiya təzyiqi yaradıb,” – sədr əlavə edib.

O, həmçinin qeyd edib ki, kənd təsərrüfatı məhsulları istehsalçılarının satış qiymətləri də artıb. Martın sonuna bu artım 2,88% təşkil edib.

“Dünya iqtisadiyyatında inflyasiya templəri aşağı düşməyə başlasa da, bir çox bazarlarda qiymət dəyişkənliyi davam edir. Bu səbəbdən, Mərkəzi Bank iqtisadi şərtləri yaxından izləməyə və ehtiyac yaranacağı təqdirdə pul siyasətini uyğunlaşdırmağa davam edəcək,” – Taleh Kazımov yekunlaşdırıb.

N.Təbrizli