Azərbaycanın ticarət tərəfdaşlarındakı inflyasiya ölkə üzrə qiymət artımına təzyiq göstərə bilər - Taleh Kazımov

Ticarət tərəfdaşlarında müşahidə edilən inflyasiya Azərbaycanın daxili inflyasiya səviyyəsinə artıcı təsir göstərir. Rəsmi proqnozlara əsasən, bu təsir 2025-ci ildə 1,74%, 2026-cı ildə isə 7%-ə yaxın olacaq. Bu  barədə Mərkəzi Bankın İdarə Heyətinin sədri Taleh Kaxımov məlumat verib. 

“Dövlət xərclərinin artımı və istehlak tələbinin yüksəlməsi də inflyasiya təzyiqlərini gücləndirə bilər. 2025-ci il üçün dövlət xərclərində artım proqnozlaşdırılır. Bununla yanaşı, nominal effektiv məzənnənin möhkəmlənməsi 2025-ci ildə inflyasiyanı 1,5%, 2026-cı ildə isə 2,45% azalda bilər”, - Kazımov bildirib. 

Onun sözlərinə görə, İqtisadi artım 2025-ci ildə 3,5%, 2026-cı ildə isə 2,4% səviyyəsində gözlənilir. 

Alternativ ssenarilərə görə, tələbin genişlənməsi ilə 2025-ci ildə 4,0%, 2026-cı ildə isə 4,2% artım baş verə bilər.

Cari ilin birinci rübündə xarici ticarət balansı 2,4 milyard ABŞ dolları təşkil edib. İl sonuna qədər bu göstəricinin 7,3–7,5 milyard dollar səviyyəsində olması gözlənilir.

“Rəsmi proqnozlara baxmayaraq, son aylarda iqtisadi mühitdə dəyişikliklər müşahidə olunub. Yeni iqtisadi alətlər və yanaşmalar tətbiq edilir və bu, inflyasiya və ticarət sahələrinə təsir edə bilər”, - Kazımov bildirib. 

N.Təbrizli