Səngəçal terminalından gündəlik 73 milyon kubmetr qaz ixrac olunub

2025-ci ilin birinci rübündə AÇG və “Şahdəniz” yataqlarından hasil edilən neft və qaz sualtı boru kəmərləri vasitəsilə Səngəçal terminalına ötürülüb, terminaldan isə ixrac əməliyyatları davam etdirilib. Bu barədə layihələrin operatoru BP məlumat yayıb.

Terminalın emal gücü hazırda gündəlik 1,2 milyon barel neft və kondensat, “Şahdəniz” qazı üçün isə 81 milyon standart kubmetr təşkil edir. Ümumi qaz emal və ixrac gücü (AÇG səmt qazı daxil olmaqla) 100 milyon standart kubmetr/sutka həcmindədir.

Rüb ərzində terminaldan 52,3 milyon barel neft və kondensat ixrac olunub, bu həcmlərin hamısı Bakı-Tbilisi-Ceyhan (BTC) boru kəməri ilə nəql edilib.

Qazın ixracı əsasən Cənubi Qafqaz Boru Kəməri (CQBK) və CQBK-nin genişləndirilməsi sistemi vasitəsilə həyata keçirilib. Eyni zamanda, terminaldan Azəriqazın daxili paylama sisteminə qaz çatdırmaq üçün ayrıca boru kəməri də istifadə olunub.

“Şahdəniz” yatağından terminal vasitəsilə rüb ərzində gündəlik orta hesabla 73,3 milyon standart kubmetr qaz ixrac edilib.