Azərbaycan İsrailə neft ixracını dayandırıb, İtaliya birincidir

2025-ci ilin yanvar–aprelində Azərbaycan İsrailə neft ixrac etməyib. Halbuki ötən il İsrail Azərbaycanın əsas neft alıcılardan biri olub. Dövlət Gömrük Komitəsinin son məlumatlarında bu ölkə alıcılar sırasında göstərilmir.

Eyni zamanda, İtaliya Azərbaycandan neft idxalını kəskin artırıb. Bu ölkə 4,4 milyon ton neft alaraq 2,45 milyard dollar ödəyib. Təkcə apreldə rekord həcmdə — 1,4 milyon ton neft alınıb və bu idxalınn dəyəri 750 milyon dollar təşkil edib. 

Ümumilikdə bu ilin ilk 4 ayında Azərbaycanın neft ixracı 8,2 milyon ton təşkil edib və bu, 4,56 milyard dollar gəlir gətirib.

Ötən ilin eyni dövründə göstəricilər müvafiq olaraq 6,93 milyon ton və 4,37 milyard dollar olub. İtaliya, Böyük Britaniya və Rumıniya daimi alıcılar sırasındadır.

Azərbaycan 8,16 milyard kubmetr təbii qaz ixrac edərək 3,07 milyard dollar gəlir əldə edib.

Neft və qaz ixracından ümumi gəlir 7,72 milyard dollar olub və bu, ölkənin ümumi ixracının 87,8%-ni təşkil edib.

Polietilen ixracı 39,4 min tona düşsə də, gəlir 46 milyon dollara yüksəlib ki, bu da bazarda tələbatın artdığına sübutdur.

SOCAR Methanol da artım nümayiş etdirib. Belə ki , bu ilin ilk 4 ayında 121,7 min ton metanol ixrac olunub və bu, 36,7 milyon dollar gəlir gətirib.

Müqayisə üçün, 2024-cü ilin eyni dövründə 148 min ton metanol ixracı cəmi 29,18 milyon dollar gəlir gətirmişdi.

SOCAR-ın törəmə müəssisələri arasında ən yüksək göstəricilər SOCAR Karbamid zavoduna məxsusdur — 215,7 min ton gübrə ixracı nəticəsində 63,5 milyon dollar gəlir əldə olunub (ötən il bu göstərici 171 min ton və 33 milyon dollar idi).

N.Təbrizli