Bakı Fond Birjası kapital bazarının dərinləşməsi üçün 7 strateji təşəbbüs elan edib

Bakı Fond Birjası (BFB) kapital bazarının inkişafı məqsədilə yeddi yeni strateji təşəbbüs irəli sürüb. Bu barədə BFB İdarə Heyəti sədrinin müavini Oqtay Qasımov təqdimat zamanı bildirib.

Qasımovun sözlərinə görə, bu təşəbbüslərin dördü səhmlər, üçü isə istiqraz bazarına yönəlib. 

“Strategiyanı hazırlayarkən gördük ki, kapital bazarının dayanıqlı inkişafı üçün bütün iştirakçıların bir platformada birləşməsi zəruridir. Bakı Fond Birjası bu məkanı təmin edən əsas vasitədir,” –  o bildirib.

O qeyd edib ki, BFB-nin əsas məqsədi investorlara şəffaf və etibarlı ticarət mühiti təqdim etməkdir. 

“Biz ticarət infrastrukturunu təkmilləşdiririk, likvidlik artırılır və bazarda iştirakçıların aktivliyi üçün yeni imkanlar yaradılır.”

Qasımov, 2020-ci ildən etibarən kütləvi təkliflərdə və qiymətli kağızların emissiya həcmlərində əhəmiyyətli artım müşahidə olunduğunu bildirib. Hazırda birjada ən aktiv ticarət istiqamətləri arasında repо əməliyyatları və dövlət qiymətli kağızları ön plandadır.

O, həmçinin bildirib ki, real sektor şirkətlərinin birjada listinqə çıxması prioritet istiqamətlərdəndir.

“Son dörd ildə bu sahədə irəliləyiş müşahidə olunub. Hazırda bazarda daha çox maliyyə alətləri təqdim olunur və müxtəlif kateqoriyalardan olan investorlar üçün uyğun investisiya imkanları formalaşdırılır”, - birja rəsmisi deyib.

Qasımov birjanın beynəlxalq əməkdaşlıqlarına da toxunub. Onun sözlərinə görə, BFB Qazaxıstan və Birləşmiş Ərəb Əmirliklərindəki birjalarla tərəfdaşlıq edir və bu əməkdaşlıq gələcəkdə investorların qlobal bazarlara çıxışını asanlaşdıracaq.

“Makroiqtisadi baxımdan bizə oxşar ölkələrdə kapital bazarının dərinliyi daha yüksəkdir. Bu isə Azərbaycanda da geniş inkişaf potensialının olduğunu göstərir,” – Qasımov əlavə edib.

N.Təbrizli