Ərdoğan Türkmən qazının tranzitini təklif edib

Türkiyə Prezidenti Rəcəb Tayyib Ərdoğan Türkmən qazının Azərbaycan və Türkiyə vasitəsilə tranzitinin mümkünlüyünü bildirərək Ankara ilə Bakı arasında enerji əməkdaşlığının əhəmiyyətini vurğulayıb.

“Ölkələrimiz enerji sahəsində mühüm uğurlar əldə edib və son illərin geosiyasi dəyişiklikləri əməkdaşlığımızın əhəmiyyətini bir daha göstərdi,” —  Ərdoğan Bakı Enerji Həftəsinin iştirakçılarına müraciətində bildirib. 

Ərdoğan Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri və TANAP layihələrini xatırladaraq, onların regionun və Avropanın enerji təhlükəsizliyinə töhfə verdiyini qeyd edib.

Türkiyə lideri Türkmən qazının Azərbaycan və Türkiyə üzərindən tranziti layihəsinin təchizat marşrutlarını genişləndirəcəyini və region ölkələrinin rifahına töhfə verəcəyini vurğulayıb.

N.Təbrizli