SOCAR Misir bazarına girməyə hazırlaşır

Azərbaycanın dövlət neft şirkəti SOCAR-ın qolu olan SOCAR Trading 2025-ci ilin iyunundan 2026-cı ilin iyununa qədər Misirə 10,4 milyon ton maye qaz (LNG) ixracı ilə bağlı beynəlxalq tenderdə iştirak edir. Bu barədə Anews.az-a məlumatlı mənbə xəbər verib. 

Tenderdə SOCAR Trading-lə yanaşı, Aramco, Trafigura, Vitol və digər iri neft-qaz ticarət şirkətləri də iştirak edir. Misir LNG-ə olan tələbatı 160 hissə ilə almğı planlaşdırır. Bu həcmi ölkəyə həm bir, həm də bir neçə şirkətin gətirməsi məsələsinə də baxılır.

"SOCAR bir illik müqavilə əldə etməyə və onu daha iki il uzatmağa ümid edir. Nəticələr iyunun sonunadək açıqlanacaq",  -  mənbə bildirib. 

SOCAR nümayəndə heyəti Misir hökuməti ilə danışıqlara 2025-ci ilin yazında  başlayıb.

Müzakirələr yalnız neft, qaz və regiona coğrafi cəhətdən yaxın üçüncü ölkələrdən neft məhsullarının tədarükünü deyil, həm də SOCAR-ın Misirin neft-qaz yataqlarının işlənməsində mümkün iştirakını əhatə edib.

“İtaliyanın Eni şirkətinin operatoru olduğu Misirin ən böyük qaz yatağı olan “Zohr”da hasilat son beş ildə demək olar ki, iki dəfə azalıb. Hazırda bu yataq ölkənin illik 60 milyard kubmetrdən çox olan qaz tələbatının yalnız üçdə birindən azını təmin edir. Bundan əlavə, Misirin İsraildən qaz idxalı da azalıb. Ölkənin LNG idxalı üzrə beynəlxalq tender elan etməsinin səbəblərindən biri də budur”, — mənbə vurğulayıb. 

SOCAR Trading üçüncü ölkələrdən LNG alqı-satqısı sahəsində geniş təcrübəyə malikdir.

Ehtiyatları 850 milyard kubmetrdən çox olan “Zohr” yatağı 10 il əvvəl kəşf edilib və 2017-ci ildən istismardadır.

Layihədə Eni (50%, operator), Rosneft (30%), BP (10%) və BƏƏ-nin Mubadala şirkəti (10%) iştirak edir. Yaxın vaxtlarda bu yataqda iki yeni quyunun qazılması planlaşdırılır.

Mənbənin bildirdiyinə görə, Misir SOCAR-ı dənizdə və quruda yerləşən yeni neft-qaz bloklarının işlənməsinə, eləcə də neft-kimya kompleksinin inkişafına cəlb etməkdə maraqlı olduğunu da bildirib. 

N.Təbrizli