İşğaldan azad olunan ərazilərdə yeni su anbarları tikiləcək

Azərbaycanın işğaldan azad olunan ərazilərində suvarma və içməli su ilə təchizatı yaxşılaşdırmaq məqsədilə bir sıra yeni su anbarlarının tikintisi planlaşdırılır. Bu barədə Azərbaycan Dövlət Su Ehtiyatları Agentliyinin (ADSEA) rəsmisi İlham Quliyev Laçında jurnalistlərə bildirib.

"Artıq Həkəriçay və Bərgüşadçay su anbarlarının texniki-iqtisadi əsaslandırmaları və layihə-smeta sənədləri hazırlanıb. Həkəriçay su anbarının 91 milyon kubmetr, Bərgüşadçay su anbarının isə 67 milyon kubmetr həcmində olması nəzərdə tutulur. Bu layihələr Laçın, Qubadlı, Zəngilan və ətraf rayonların suvarma və içməli su təminatına ciddi töhfə verəcək”, –  o qeyd edib.

Agentlik rəsmisi əlavə edib ki, 565 milyon kubmetr həcmində planlaşdırılan Sərsəng su anbarı üzrə sənədləşmə prosesi də tamamlanmaq üzrədir.

Bu anbar Ağdərə, Tərtər, Ağdam, Bərdə, Goranboy və Yevlax rayonlarında 96 min hektar sahənin suvarılmasına xidmət edəcək.

Bundan başqa, Qız qalası su anbarı, onunla bağlı 52 km-lik magistral kanal və Tərtərçay Sağ Sahil suvarma kanalı layihələrinin də sənədləri hazırdır və yaxın müddətdə icrasına başlanması planlaşdırılır.

Aytac Zeynalova