Azərbaycanda maliyyə ekosistemi rəqəmsallaşma və təhlükəsizlik üzərində qurulur -Zakir Nuriyev

Azərbaycanın maliyyə sektorunda rəqəmsal transformasiya davamlı və dərinləşən prosesə çevrilib və yeni texnologiyalarla yanaşı, təhlükəsizlik məsələləri də prioritet olaraq qalır.Bunu   Azərbaycan Banklar Assosiasiyasının rəbəri Zakir Nuriyev bildirib.

“Bank və Maliyyə Ekosistemində Yeni Trendlər: İnnovativ Həllər, FinTex və Təhlükəsizlik” mövzusunda forumda çıxış edən Nuriyev, Mərkəzi Bank tərəfindən açıq bankçılığa əsaslanan mərkəzləşdirilmiş platforma üzərində işlərin getdiyini və fintex şirkətlərinin beynəlxalq standartlara uyğun fəaliyyət göstərdiyini qeyd edib.

Onun sözlərinə görə, hazırda ölkədə 19 elektron pul təşkilatı, 8 ödəniş təşkilatı və bir ödəniş sistemi operatoru lisenziyaya malikdir. 2025-ci ilin ilk dörd ayında nağdsız ödənişlərin payı 67%-ə çatıb, elektron ticarət dövriyyəsi isə 1.4 dəfə artıb.

Bank sektorunun aktivləri 2025-ci ilin aprel ayının sonuna 54.6 milyard manata çataraq illik 10.9% artıb. 

Bank sektorunun ümumi mənfəəti 339.8 milyon manat, faiz gəliri isə 1.5 milyard manat təşkil edib. Ölkədə ödəniş kartlarının sayı 20.7 milyona çatıb, onların 81%-i təmassız ödənişləri dəstəkləyir.

Nuriyev, həmçinin rəqəmsal bankçılıq üçün yeni qanunvericilik, innovasiya mərkəzlərinin yaradılması, dövlət məlumatlarına təhlükəsiz çıxış və fırıldaqçılıqla mübarizə sistemlərinin təkmilləşdirilməsinin qarşıdakı dövr üçün əsas prioritetlər olduğunu vurğulayıb.

“İnnovasiya ruhu, gücləndirilmiş təhlükəsizlik və inklüziv əməkdaşlıq Azərbaycan maliyyə ekosistemini qlobal rəqabətə daşıyacaq,” —  ABA rəhbəri bildirib.

N.Təbrizli