Avropada təbii qazın qiyməti 12%-dən çox ucuzlaşıb

Niderlandın TTF hub-ında təbii qazın fyuçers qiymətləri 12%-dən çox azalaraq 35,3 avro/MVt·saata düşüb. ICE məlumatlarına əsasən, bir gecədə qiymətlər 5 avro geriləyib. Bu, 11 iyundan — İsrail-İran qarşıdurmasından əvvəlki səviyyəyə ilk dəfədir ki, düşür.

ExPro xəbər verir ki, qiymətlərin düşməsi ABŞ prezidenti Donald Trampın İsrail və İran arasında atəşkəsə dair açıqlamasından sonra baş verib. Beləliklə, münaqişə ilə bağlı narahatlıqların yaratdığı artım tamamilə silinib.

Avropa qaz bazarı həm Norveçdən gələn boru xətti qazı, həm də maye qaz (LNG) ilə yaxşı təmin olunur. Atəşkəs sayəsində Hörmüz boğazı vasitəsilə LNG təchizatında hər hansı bir kəsinti gözlənilmir.

Eyni zamanda, İsrailin qaz yataqlarında hasilatı və Misirə ixracı yaxın günlərdə bərpa edəcəyi gözlənilir ki, bu da Misirin spot LNG alışlarını azalda bilər.

Bundan əvvəl bildirilmişdi ki, neft qiymətləri də aşağı düşüb. Brent $67,6, WTI isə $64,6-a qədər enib.

N.Təbrizli