Bərpa olunan enerji üçün 173,5 mln. dollarlıq kredit sazişi imzalanıb

Azərbaycan hökuməti və Dünya Bankı arasında 173,5 milyon ABŞ dolları dəyərində kredit sazişi imzalanıb. Bu barədə Maliyyə Nazirliyindən bildirilib. 

Saziş “Azərbaycanda bərpa olunan enerji mənbələrindən istifadənin genişləndirilməsi layihəsi” çərçivəsində həyata keçirilir.

“AzərEnerji” ASC-nin İdarə Heyətinin sədri Baba Rzayev və Dünya Bankının Azərbaycan üzrə ölkə meneceri Ştefani Ştаlmaister kredit müqaviləsini, maliyyə naziri Sahil Babayev və Ştаlmaister isə zəmanət sazişini təsdiqləyib.

Kredit vəsaiti bərpa olunan enerji mənbələrindən alınan enerjinin milli enerji sisteminə təhlükəsiz inteqrasiyası üçün enerji ötürücü infrastrukturun gücləndirilməsinə yönəldiləcək.

Layihə çərçivəsində 341 km uzunluğunda 500 və 330 kV-luq elektrik verilişi xətləri inşa olunacaq və Nəvahi yarımstansiyası üçün avadanlıq alınacaq.

Kredit 5 illik güzəşt müddəti ilə 15 il ərzində geri qaytarılacaq.

Layihənin ümumi müddəti 4 ildir, Azərbaycan hökumətinin iştirak payı 31,2 milyon dollar təşkil edir və əsasən ƏDV və gömrük rüsumlarının ödənilməsinə sərf ediləcək.