Ələt Azad İqtisadi Zonasında yeni fabriklər açılır, investor axını artır — Manafov

İnvestor marağının yüksək olması səbəbindən Ələt Azad İqtisadi Zonasının əlavə 138 hektar ərazisində yeni tikinti işlərinə başlanılıb və artıq 41 hektar sahə yeni investor müəssisələri üçün ayrılıb.

“Bu il biri tikinti materialları, digəri isə ağac məhsulları istehsal edəcək iki fabrik fəaliyyətə başlayacaq. Eyni zamanda, 10-a yaxın şirkət hüquqi şəxs kimi qeydiyyatdan keçmək üçün prosesə start verib,” — zonanın İdarə Heyətinin sədr müavini İsmayıl Manafov bildirib.

Onun sözlərinə görə, zonada 50 000 kvadratmetrlik logistika və nəqliyyat mərkəzi yaradılıb və bu mərkəz ildə 500 000 ton yük qəbul edə bilir. Manafov əlavə edib ki, rezidentlərin tələbatını ödəmək üçün zonada yeni yük hava limanının tikintisinə də başlanılıb.

“Hava limanı 2026-cı ildə istifadəyə veriləcək. İlkin mərhələdə 500 000 ton, gələcəkdə isə 1,5 milyon tonluq illik yükaşırma gücünə malik olacaq,” — o qeyd edib.

Ələt Azad İqtisadi Zonasının əsas məqsədi ixrac yönümlü və yüksək əlavə dəyərli istehsal sahələrinə sərmayə cəlb etməkdir. Zonada istehsal olunan məhsulların 75 faizi ölkədən ixrac edilməlidir.

Manafov qeyd edib ki, gəlir vergisi, ƏDV, mənfəət və digər korporativ vergilərdən azadolmalar, gömrük rüsumları üzrə güzəştlər və hazır infrastrukturla təmin olunmuş sənaye torpaq sahələri zonanı cəlbedici edən əsas amillərdəndir.

Hazırda zonanın ilkin mərhələsi üzrə 850 hektarlıq ərazi tam infrastrukturlu şəkildə istifadəyə verilib və layihə çərçivəsində əlavə 7 500 hektar torpaq sahəsi də ayrılıb.

“ECO ölkələrindən olan, ixrac və yüksək əlavə dəyərli istehsala fokuslanan investorları Ələt Azad İqtisadi Zonasının təqdim etdiyi əlverişli imkanlardan istifadə etməyə dəvət edirik,” — deyə Manafov bildirib. 

N.Təbrizli