Turizm ECO ölkələri üçün prioritet əməkdaşlıq sahəsidir

Turizm sahəsi İqtisadi Əməkdaşlıq Təşkilatına (ECO) üzv ölkələr arasında ən mühüm və perspektivli əməkdaşlıq istiqamətlərindən biridir. Bunu AZPROMO-nun (İxracın və İnvestisiyaların Təşviqi Agentliyi) icraçı direktoru Yusif Abdullayev Şuşada jurnalistlərə açıqlamasında bildirib.

Onun sözlərinə görə, tekstil sektoru da üzv ölkələr arasında əməkdaşlığın genişləndirilməsi üçün cəlbedici sahələrdəndir: “ECO ölkələrinin hamısı bu sahədə geniş təcrübəyə malikdir”.

Abdullayev ECO-nun baş katibinin ticarətin təşviqi üçün üzv ölkələrin strukturları arasında mübadilə platforması yaradılması təşəbbüsünü dəstəklədiyini bildirib və qeyd edib ki, bu istiqamətdə tərəflər gələcək əməkdaşlıq üçün addımlar atacaqlar.

O, həmçinin gələcəkdə ECO ölkələrinin iştirakı ilə birgə sərgilərin təşkilinin mümkünlüyünü istisna etməyib və əlavə edib ki, növbəti görüşlərdə nəqliyyat və logistika əlaqələrinin inkişafı da diqqət mərkəzində olacaq.