SOCAR-ın xalis mənfəəti 2024-cü ildə 30% artıb

SOCAR 2024-cü ildə gəlirlərinin bir qədər azalmasına baxmayaraq xalis mənfəətini 30% artıraraq 2,9 milyard manata (təxminən 1,7 milyard dollar) çatdırıb. Bu barədə şirkətin illik maliyyə hesabatında bildirilir.

2024-cü ildə SOCAR-ın ümumi gəlirləri 84,7 milyard manat təşkil edib ki, bu da ötən illə müqayisədə 512 milyon manat azdır.

Satışların maya dəyəri isə artaraq 77,3 milyard manata yüksəlib. Bu səbəbdən şirkətin ümumi mənfəəti 2023-cü ildəki 8,6 milyard manatdan 7,4 milyard manata enib.

SOCAR həmçinin əməliyyat xərclərini 700 milyon manat azaldaraq 6,5 milyard manata endirib. Əsas azalma paylaşdırma və sair əməliyyat xərclərində müşahidə olunub.

Şirkətin əməliyyat mənfəəti 2,9 milyard manata yüksəlib. Xarici valyuta gəlirləri, faiz gəlirləri və törəmə müəssisələrdən əldə olunan mənfəət SOCAR-ın vergi öncəsi ümumi mənfəətini 3,8 milyard manata çatdırıb.

Vergilərdən sonra xalis mənfəət 2,9 milyard manat təşkil edib ki, bu da 2023-cü illə müqayisədə 850 milyon manat və ya 30% çoxdur.

Şirkətin aktivləri də ciddi şəkildə artaraq 2023-cü ildəki 71,9 milyard manatdan 94,7 milyard manata yüksəlib.

Bu artım əsasən uzunmüddətli investisiyalar və müəssisə satınalmaları ilə izah olunur.

N.Təbrizli