Azərbaycanın valyuta ehtiyatları xarici dövlət borcunu 15,5 dəfə üstələyir – Maliyyə Nazirliyi

2025-ci il iyulun 1-nə olan məlumata görə, Azərbaycanın valyuta ehtiyatları 77,7 milyard ABŞ dolları təşkil edib ki, bu da ölkənin xarici dövlət borcunu təxminən 15,5 dəfə üstələyir. Bu barədə Maliyyə Nazirliyinin hesabatında qeyd olunur.

Hesabata əsasən, hazırda mövcud olan kredit müqavilələri və avrobondlar üzrə geri ödəniş qrafiklərinə uyğun olaraq xarici dövlət borcunun Orta Ödəmə Müddəti 5,4 il təşkil edir.

2025-ci il iyulun 1-nə xarici dövlət borcunun valyuta strukturunda ABŞ dolları üstünlük təşkil edir – 85,1 faiz. 

Avro ilə borcun payı 6,5 faiz, Beynəlxalq Valyuta Fondunun Xüsusi Borcalma Hüquqları (XBH) ilə 3,4 faiz, digər valyutalarla isə 1,7 faiz olub.

Nazirlik həmçinin bildirir ki, cari ilin birinci yarısında dövlət büdcəsi hesabına xarici borclar üzrə ümumilikdə 293,3 milyon ABŞ dolları əsas borc və 117,8 milyon ABŞ dolları faiz ödənişi həyata keçirilib.

Gülnar