7 ayda Naxçıvanda vətəndaşlara geri qaytarılan ƏDV-nin məbləği açıqlanıb

2025-ci ilin yanvar-iyulunda Naxçıvanda pərakəndə ticarət və yaxud ictimai iaşə fəaliyyəti göstərən obyektlərdən alınmış mallara (neft və qaz məhsulları, avtomobillər, alkoqollu içkilər və tütün məmulatları istisna olmaqla), eləcə də tibb müəssisələri və özəl tibbi praktika ilə məşğul olan fiziki şəxslərin göstərdiyi tibbi xidmətlərə görə ödənilmiş ƏDV-nin 984,8 min manatlıq hissəsi fiziki şəxs olan istehlakçılara geri qaytarılıb. Bu barədə İqtisadiyyat Nazirliyi yanında Dövlət Vergi Xidmətinə istinadən xəbər verir.

Bu, ötən ilin eyni dövrü ilə müqayisədə 23 % çoxdur.

İndiyə qədər vətəndaşlara geri qaytarılan ƏDV-nin ümumi məbləği isə 3,3 milyon manata yaxınlaşıb.

Bundan əlavə, “ƏDV geri al” layihəsinin genişləndirilməsi nəticəsində fiziki şəxslərə ölkə daxilində bina tikintisi fəaliyyəti ilə məşğul olan şəxslərdən nağdsız qaydada alınmış yaşayış və qeyri-yaşayış sahələrinə görə ödənilən ƏDV-nin qismən qaytarılması prosesi də davam edir.

Son 5 ayda bu istiqamətdə qaytarılan ƏDV məbləği 12,8 milyon manat təşkil edib.

Aytac