ABŞ birja indeksləri rekord səviyyəyə yüksəldi

ABŞ-ın fond bazarları çərşənbə axşamı günü 1%-dən çox artımla bağlanıb. S&P 500 və Nasdaq indeksləri tarixi maksimumlara çatıb. Səbəb inflyasiyanın gözləniləndən aşağı olması və sentyabrda Federal Ehtiyat Sisteminin (FED) uçot dərəcəsini azalda biləcəyi ilə bağlı artan gözləntilərdir.

Əmək Nazirliyinin məlumatına görə, ABŞ-da iyul ayında illik inflyasiya səviyyəsi 2,7% təşkil edib və bu, iyun ayındakı göstərici ilə eyni qalıb. Analitiklər isə artımın 2,8%-ə yüksələcəyini proqnozlaşdırırdı.

İnflyasiyanın sabit qalması FED-in sentyabrda uçot dərəcəsini 25 baza bəndi azaltması ehtimalını gücləndirib. Hazırda bazar iştirakçıları bu addımın ehtimalını 90% səviyyəsində qiymətləndirir.

Eyni zamanda, ABŞ-da kiçik biznesə dair nikbinlik indeksi iyulda son 5 ayın maksimumuna – 100,3 bəndə çatıb (iyunda 98,6 bənd idi).

Səhmləri ən çox artanlar arasında United Airlines (+10,2%), Delta Air Lines (+9,2%) və Southwest Airlines (+5,7%) olub. Texnoloji nəhənglərdən Apple (+1,1%), Microsoft (+1,4%) və Alphabet (+1,2%) də dəyər qazanıb.

Cardinal Health səhmləri Solaris Health şirkətini 1,9 milyard dollara almaq qərarından sonra 7,2% ucuzlaşıb. McDonald’s (-0,9%), IBM və Johnson & Johnson (-0,6%) və Mosaic (-4%) səhmlərində də ucuzlaşma qeydə alınıb.

Dow Jones indeksi 483,52 bənd (+1,1%) artaraq 44 458,61 bəndə, S&P 500 indeksi 72,31 bənd (+1,1%) artaraq 6 445,76 bəndə, Nasdaq indeksi isə 296,5 bənd (+1,4%) artaraq 21 681,9 bəndə çatıb.

N.Təbrizli