Azərbaycanın magistral qaz kəmərlərində itkilər artıb, qaz nəqli azalıb

2025-ci ilin yanvar-iyun aylarında Azərbaycanda magistral qaz kəmərlərində 25,5 milyon kubmetr qaz itkisi qeydə alınıb ki, bu da ötən ilin eyni dövrü ilə müqayisədə 7,1% çoxdur. Bu barədə Dövlət Statistika Komitəsi məlumat yayıb.

2024-cü ilin ilk yarısında ölkədə qaz kəmərlərində 23,8 milyon kubmetr itki qeydə alınmışdı.

Ötən il üzrə ümumilikdə 47,3 milyon kubmetr itki qeydə alınmış, bu göstərici illik müqayisədə 20,9% azalmışdı.

Cari ilin ilk yarısında Azərbaycanda magistral qaz kəmərləri ilə ümumilikdə 20 milyard 260,5 milyon kubmetr qaz nəql edilib ki, bu da illik əsasda 1,4% azalma deməkdir.

Qaz nəqlinin 55,5%-i Bakı-Tbilisi-Ərzurum (BTƏ) Cənubi Qafqaz boru kəməri ilə həyata keçirilib. Bu boru kəməri vasitəsilə “Şahdəniz” yatağından hasil edilən qaz ixrac olunur. Hesabat dövründə BTƏ ilə 11 milyard 235,7 milyon kubmetr qaz ötürülüb ki, bu da ötən ilin müvafiq dövrü ilə müqayisədə 1,6% azdır.

2024-cü ilin yekunlarına əsasən, Azərbaycanda ümumilikdə 40 milyard 348,3 milyon kubmetr qaz nəql olunmuşdu və bu, 2023-cü ilə nisbətən 2,7% artım demək idi. Həmin il BTƏ boru kəməri vasitəsilə 22 milyard 851,9 milyon kubmetr qaz nəql edilmiş, bu da illik əsasda 4,3% artım demək idi. Qaz nəqlinin 56,6%-i bu kəmərin payına düşmüşdü.

Gülnar