Bank sektorunun aktivləri 7% artıb

2025-ci ilin ilk 6 ayı ərzində bank sektorunun cəmi aktivləri 7% (3,74 mlrd. manat) artaraq 56,7 mlrd. manata çatıb. Bu barədə Mərkəzi Bank məlumat verib. 

Cəmi öhdəlikləri isə 7,3% (3,41 mlrd. manat) artaraq 49,8 mlrd. manat təşkil edib.

Nəticədə, bank sektorunun dərinlik göstəricisi olan aktivlərin ÜDM-ə nisbəti ötən ilin sonu ilə müqayisədə 3,7 faiz bəndi artaraq 45,7%-ə yüksəlmişdir. Balansın genişlənməsinin əsas səbəbi Maliyyə Nazirliyinin depozit əməliyyatları və fiziki şəxslərin müddətli depozitlərinin artımı olmuşdur.

2025-ci ilin ilk yarısına olan məlumatlara əsasən, bank sektorunun aktivlərinin 47%-ni xalis kredit portfeli, 28%-ni likvid aktivlər, 25%-ni isə digər aktivlər təşkil etmişdir. Aktivlərin 18%-i isə qiymətli kağızlardan ibarətdir.

Öhdəliklərin strukturuna nəzər saldıqda, onların 45%-i hüquqi şəxslərin depozitləri, 30%-i fiziki şəxslərin əmanətləri, 6%-i mərkəzi idarəetmə orqanlarının depozit və kreditləri, 14%-i digər maliyyə institutları qarşısında öhdəliklər, 5%-i isə digər öhdəliklərdir.

Ötən ilin sonu ilə müqayisədə aktivlər üzrə təmərküzləşmədə müəyyən qədər artım olsa da, depozit və kredit portfelləri üzrə təmərküzləşmədə azalma müşahidə olunmuşdur.

Beynəlxalq təcrübədə geniş istifadə olunan HHI indeksinə əsasən, cari ilin ilk yarısına kredit portfeli üzrə təmərküzləşmə ötən ilin sonu ilə müqayisədə 6 vahid azalaraq 1201 təşkil edib.

Depozit portfeli üzrə təmərküzləşmə indeksi isə 8 vahid azalaraq 1645 olmuşdur. Aktivlər üzrə HHI göstəricisi isə 5 vahid artaraq 1480-ə çatmışdır.

Beləliklə, bank sistemində kredit portfelinə əsasən aşağı səviyyədə, depozit portfelinə görə isə orta səviyyədə təmərküzləşmə mövcuddur.

Aktivlərin ümumi məbləğinə əsasən bank sektoru aşağı və orta təmərküzləşmə sərhədindədir. Mərkəzi Bank bu göstəriciləri daim diqqətdə saxlayır.

N.Təbrizli