Azərbaycanın İƏT ölkələri ilə ticarət dövrüyəsi 6 milyard dollardır

2025-ci ilin səkkiz ayında Azərbaycan ilə İslam Əməkdaşlıq Təşkilatına (İƏT) üzv ölkələr arasında ticarət dövriyyəsi təxminən 6 milyard ABŞ dolları təşkil edib. Bu barədə iqtisadiyyat nazirinin müavini Elnur Əliyev Bakıda keçirilən Halal Biznes Forumundan çıxışı zamanı deyib. .

Əliyev bildirib ki, hazırda Azərbaycanda İƏT ölkələrinə məxsus təxminən 11 min şirkət fəaliyyət göstərir ki, bu da iqtisadi əlaqələrin genişliyini və qarşılıqlı investisiya marağını göstərir.

“Azərbaycan İƏT məkanında mühüm iqtisadi tərəfdaş və təşəbbüskar ölkə kimi formalaşıb,” –  Əliyev vurğulayıb.

Nazir müavini həmçinin qeyd edib ki, 2004–2024-cü illər ərzində Azərbaycan iqtisadiyyatına ümumilikdə 344 milyard ABŞ dollarından çox sərmayə qoyulub. Bu vəsaitin 213 milyard dolları qeyri-neft sektorunun inkişafına yönəldilib, bu da ölkənin iqtisadiyyatının diversifikasiyası istiqamətində atdığı ardıcıl addımları nümayiş etdirir.

Bu günlərdə Bakıda keçirilmiş Birinci Azərbaycan İnvestisiya Forumu çərçivəsində dəyəri 10 milyard dollardan artıq olan layihələr üzrə sənədlər imzalanıb. Rəsmi məlumatlara görə, sazişlər əsasən enerji, infrastruktur və texnologiya sahələrini əhatə edir.

İslam Əməkdaşlıq Təşkilatı 57 üzv dövlətdən ibarət olmaqla, dünya üzrə əhalisinin təxminən 1,9 milyardını əhatə edir. Azərbaycanın bu qurum çərçivəsində iqtisadi əməkdaşlıq sahəsində rolunun son illərdə artdığı müşahidə olunur. Bakı, ticarət, kənd təsərrüfatı və ərzaq təhlükəsizliyi sahələrində təşəbbüslərlə çıxış edən əsas iştirakçılardandır.

Gülnar Nazimqızı