KOB subyektləri kibertəhlükəsizlik texnologiyalarına kifayət qədər sərmayə qoya bilmir

Məhdud resurslar şəraitində fəaliyyət göstərən KOB subyektləri iri müəssisələrlə müqayisədə kibertəhlükəsizlik texnologiyalarına və təlimlərinə kifayət qədər sərmayə qoya bilmir. Bunu Kiçik və Orta Biznesin İnkişafı Agentliyinin (KOBİA) sədri Bakıda keçirilən “Critical Infrastructure Defence Challenge 2025” (CIDC-2025) tədbirində deyib.

Onun məlumatına görə, bir çox hallarda bu müəssisələr potensial kibertəhlükələrdən xəbərsiz olur ki, bu da “qeyri-dost qüvvələrin” asanlıqla istifadə edə biləcəyi boşluqlar yaradır. 

"Nəticədə, kiçik bizneslərə qarşı kiberhücumlar domino effekti yaradaraq digər KOB-lara, iri şirkətlərə, dövlət qurumlarına və kritik infrastruktura zərər yetirə bilər.KOB-lar üçün effektiv və praktik kibertəhlükəsizlik həllərinin hazırlanması milli iqtisadiyyatın dayanıqlığı baxımından strateji əhəmiyyət kəsb edir. Bu məqsədlə kollektiv yanaşma — yəni, dövlət qurumları, biznes və texnoloji tərəfdaşlar arasında əməkdaşlıq vacib sayılır" ,- Məmmədov deyib

Hazırda keçirilən “Kritik İnfrastrukturun Müdafiəsi – CİDC 2025” tədbiri bu istiqamətdə mühüm platforma rolunu oynayır. 
Sədr həmçinin bildirir ki, agentlik KOB-ların rəqəmsallaşması və rəqəmsal bacarıqlarının artırılması istiqamətində tədbirlər görür.

" 2020–2024-cü illər ərzində bizneslərin proqram təminatı və İKT avadanlıqlarına xərcləri təxminən 2,4 dəfə artaraq illik 370 milyon manatı ötüb. 2023-cü ildə KOB subyektlərinin elmi-tədqiqat xərcləri 18 milyon manatdan çox təşkil edib",- o əlavə edib.

Azərbaycanda ikinci dəfə “Critical Infrastructure Defence Challenge 2025” (CIDC-2025) kiberfestivalı keçirilir. Konfransda daxili işlər naziri Vilayət Eyvazov və bir sıra rəsmilər iştirak edir.

Gülnar Nazimqızı