TAP ilə Avropaya Azərbaycan qazı ixracında azalma qeydə alınıb

Azərbaycanın təbii qazını Avropaya nəql edən Trans-Adriatik Boru Kəməri (TAP) vasitəsilə oktyabrın 13-də Yunanıstanın Kipoi çıxış nöqtəsindən 359,99 milyon kVt/saat həcmində qaz sifariş edilib ki, bu da ötən həftənin eyni gününə nisbətən 5,26% azalma deməkdir. Bu barədə məlumatı TAP-ın elektron platforması yayıb. 

Oktyabrın 14-dən 20-dək olan dövr üçün Kipoi nöqtəsindən sifariş həcmi 331,02 milyon kVt/saat təşkil edib. Bu, ötən həftənin göstəriciləri ilə müqayisədə 12,88%, oktyabrın 8–12-si aralığındakı sifarişlərlə müqayisədə isə 12,89% azalıb.

Yunanıstanın digər iki çıxış nöqtəsi üzrə göstəricilər stabillik nümayiş etdirib.

Komotini çıxış nöqtəsindən gündəlik sifariş həcmi sabit olaraq 28,67 milyon kVt/saat olub.

Nea Mesimvria nöqtəsindən isə 30,35 milyon kVt/saat sifariş qeydə alınıb ki, bu da əvvəlki həftə ilə eynidir.

İtaliyanın Melenduqno çıxış nöqtəsi üzrə isə daha kəskin azalma müşahidə olunub.

Oktyabrın 13-də bu nöqtədən 297,48 milyon kVt/saat qaz sifariş olunub ki, bu da oktyabrın 6-sı ilə müqayisədə 6,15% azalma deməkdir.

Oktyabrın 14-dən 20-dək dövr üçün sifariş həcmi 271,99 milyon kVt/saat olub, bu isə əvvəlki həftəyə nisbətən 14,32% azalma təşkil edir.

Trans-Adriatik Boru Kəməri Azərbaycanın “Cənub Qaz Dəhlizi” layihəsinin son seqmentidir və 2020-ci ilin oktyabrında tamamlanıb. TAP-ın uzunluğu 878 km təşkil edir, qaz 550 km Yunanıstan, 215 km Albaniya, 105 km Adriatik dənizi və 8 km İtaliya ərazisindən keçərək Avropaya çatdırılır. Azərbaycan qazının TAP vasitəsilə Avropa istehlakçılarına tədarükünə 2020-ci il dekabrın 31-də başlanılıb.

Gülnar