SOCAR “Ümid” yatağında 7067 metr dərinlikdə yeni qiymətləndirmə quyusu qazacaq

“Neptun” adlı özüqalxan üzən qazma qurğusu vasitəsilə “Ümid” yatağının Cənub qanadında sualtı qiymətləndirmə quyusunun qazılması 2025-ci ilin oktyabr ayında planlaşdırılır. Bu barədə Azərbaycan Dövlət Neft Şirkətindən (SOCAR) məlumat verilib.

Bu layihə SOCAR tarixində ilk dəfə sualtı qiymətləndirmə quyusunun özüqalxan qazma qurğusu ilə qazılmasını nəzərdə tutur.

 Eyni zamanda, bu quyu “Ümid” yatağında indiyədək qazılan ən dərin quyu olacaq – layihə dərinliyi 7067 metr təşkil edir.

Qazma işlərinin 10 ay ərzində tamamlanacağı və quyunun lay sınağına təhvil veriləcəyi planlaşdırılır.

1 sentyabr 2025-ci il tarixinədək “Ümid” yatağının işlənməsinin birinci mərhələsi çərçivəsində ümumilikdə 12,3 milyard kubmetr qaz və 1,8 milyon ton kondensat hasil edilib.

“Ümid” qaz-kondensat yatağı 2010-cu ildə Xəzər dənizinin Azərbaycan sektorunda, Bakıdan təxminən 75 kilometr cənubda kəşf edilib. Layihə SOCAR tərəfindən idarə olunur və Azərbaycanın qaz hasilatı portfelində strateji əhəmiyyət daşıyır. Yatağın ikinci mərhələsi ölkənin enerji ixrac potensialını artırmaq məqsədi daşıyır.

Gülnar Nazimqızı