Dünya iqtisadiyyatı qeyri-sabit vəziyyətdədir - maliyyə nazirinin müavini

Dünya iqtisadiyyatında mövcud olan qeyri-sabitlik, geosiyasi risklər və inflyasiya təzyiqləri fonunda Azərbaycan dayanıqlı və balanslı iqtisadi idarəetmə modeli ilə seçilir. Bunu maliyyə nazirinin müavini Azər Bayramov oktyabrın 22-də İqtisadi siyasət, sənaye və sahibkarlıq komitəsinin elmi-praktim konfransında bildirib.

“Hazırda bir çox ölkələrdə yüksək borclanma, büdcə kəsiri və donor maliyyələşməsinə ehtiyac müşahidə olunur. Belə bir şəraitdə Azərbaycanın üstünlüyü ehtiyatlı fiskal siyasət, nizamlı iqtisadi idarəetmə və koordinasiyalı qərarvermə prosesidir", – Bayramov vurğulayıb.

Nazir müavini qeyd edib ki, ölkənin iqtisadi suverenliyinin daha da gücləndirilməsi məqsədilə yeni inkişaf hədəfləri müəyyənləşdirilib.

Bayramovun sözlərinə görə, Azərbaycanın qarşısında duran əsas prioritetlər bunlardır:

Daxili istehsalın genişləndirilməsi, texnoloji müstəqilliyin təmin olunması,idxalı əvəz edən və ixracyönümlü sahələrin inkişafı, fiskal dayanıqlığın qorunması və rəqəmsal nəzarət sistemlərinin tətbiqi, insan kapitalının yeni mərhələyə hazırlanması – təhsil və innovasiyaya.

Qlobal iqtisadi şəraitdə inflyasiya səviyyəsinin yüksəlməsi, enerji və ərzaq bazarlarında qeyri-sabitlik, geosiyasi gərginliklər və ticarət müharibələri bir sıra ölkələrin iqtisadi dayanıqlığını zəiflədib. Beynəlxalq Valyuta Fondu və Dünya Bankı 2025-ci il üçün qlobal artım proqnozlarını aşağı salıb.

Gülnar Nazimqızı