Xankəndidə mənzillər satışa çıxarılacaq

Xankəndidə mənzillər satışa çıxarılacaq. Bunu Xankəndi şəhərində, Ağdərə və Xocalı rayonlarında Prezident xüsusi nümayəndəsi Elçin Yusubov məsələ ilə bağlı bildirib.

Onun sözlərinə görə, sahibkarlar şəhərdə hündürmərtəbəli çoxmənzilli yaşayış binalarının inşasına başlayıb və tikinti başa çatdıqdan sonra mənzillər satışa çıxarılacaq.

"Artıq Xankəndidən mənzil almaq istəyən vətəndaşlardan xeyli müraciət daxil olub. Mənzillərin satışı həm nağd şəkildə, həm də kreditlə mümkün olacaq. Sahibkarların banklarla imzaladığı müqavilələr əsasında vətəndaşlara kreditlə mənzil almaq imkanı yaradılacaq. Bu prosesin şəffaf və rahat həyata keçirilməsi üçün sahibkarlara zəruri dövlət dəstəyi göstəriləcək",- məlumatda qeyd olunub.

Hazırda Xankəndində 12 erməni yaşayır. Onların təhlükəsizliyi hüquq-mühafizə orqanları tərəfindən daim nəzarətdə saxlanılır. 

2023-cü ilin sentyabrında Azərbaycan ordusunun həyata keçirdiyi antiterror tədbirləri nəticəsində Xankəndi və ətraf bölgələr üzərində ölkənin  tam suveren nəzarəti bərpa edilib.

Bundan sonra şəhərin yenidən qurulması, əhalinin könüllü və mərhələli şəkildə geri qaytarılması, təhsil, infrastruktur, iqtisadiyyat və şəhərsalma sahələrində genişmiqyaslı layihələrin icrasına başlanılıb.

Indiyə kimi Xankəndi, Ağdərə və Xocalı rayonlarının 19 yaşayış məntəqəsində 1040 ailə olmaqla 4064 nəfər köçürülüb. Hazırda 3 bölgə üzrə 546 sahibkarlıq obyektində 3 mindən artıq şəxs işlə təmin olunub.

Aytac Zeynalova