Yeni qaydadan sonra işçilər ayda 2 dəfə maaş ala biləcək

Azərbaycan Əmək Məcəlləsinə təklif olunan dəyişiklik işçilərin əməkhaqlarının ayda ən azı bir dəfə, tərəflərin razılığı ilə isə iki dəfə ödənilməsini nəzərdə tutur.

Mövcud sistemdə əməkhaqqı və vergi hesabatlılığı əsasən ayda bir dəfə həyata keçirilirdi.

Milli Məclisin deputatı Vüqar Bayramov iqtisadiyyat.az-a bildirib ki, yeni mexanizm həm ailə büdcəsinin planlaşdırılmasını asanlaşdıracaq, həm də vergilərin hesablanması üzrə proqram təminatının yenilənməsini tələb edəcək.

Bayramov dəyişikliklərin “beynəlxalq təcrübəyə uyğunlaşdırma” məqsədi daşıdığını, Beynəlxalq Əmək Təşkilatının da əməkhaqqının iki hissədə ödənilməsini tövsiyə etdiyini deyib.

Deputata görə, əməkhaqqının iki dəfə verilməsi işçilərə xərclərini daha operativ planlaşdırmağa imkan yaradacaq və “əməkhaqqının daha səmərəli istifadəsi” ilə nəticələnə bilər.