TAP-la Avropaya qaz tədarükünə sifarişlər azalıb

Azərbaycan təbii qazını Avropaya nəql edən Trans-Adriatik Boru Kəməri (TAP) üzrə Yunanıstanın Kipoi çıxış nöqtəsindən dekabrın 15-də 349,5 milyon kVt/saat həcmində sifariş alınıb ki, bu da ötən həftənin bazar ertəsi ilə müqayisədə 0,14% azalma deməkdir.

Kipoi çıxışından dekabrın 16–22-də sifarişlər 348,0 milyon kVt/saat təşkil edib. Bu göstərici dekabrın 9–15-i ilə müqayisədə 0,43% aşağıdır.

Digər çıxış nöqtələrində isə göstəricilər sabit qalıb. Komotini çıxışından dekabrın 15–22-də gündəlik sifarişlər əvvəlki həftə səviyyəsində — 28,7 milyon kVt/saat olub. Nea Mesimvria çıxışından eyni dövrdə sifariş həcmi 30,3 milyon kVt/saat təşkil edib və həftəlik dəyişiklik qeydə alınmayıb.

İtaliyanın Melenduqno çıxış nöqtəsindən qaz tədarükü üçün dekabrın 15–22-də qəbul edilən sifarişlər 287,0 milyon kVt/saat olub ki, bu da dekabrın 8–15-i ilə müqayisədə dəyişməyib.

Fon məlumatına görə, TAP-ın tikintisi 2020-ci ilin oktyabrında tamamlanıb. Boru kəmərinin ümumi uzunluğu 878 km təşkil edir: 550 km Yunanıstan, 215 km Albaniya, 105 km Adriatik dənizinin dibi və 8 km İtaliya ərazisindən keçir. Azərbaycan qazının TAP vasitəsilə İtaliya, Yunanıstan və Bolqarıstana kommersiya tədarükünə 2020-ci il dekabrın 31-dən başlanılıb.

Aytac