Aztelekom Qarabağ və Şərqi Zəngəzurda rabitə şəbəkəsini genişləndirib

Son bir il ərzində Qarabağ və Şərqi Zəngəzur iqtisadi rayonlarında 9 şəhər, 27 kənd və qəsəbə rabitə və yüksəksürətli internet infrastrukturu ilə təmin edilib. Bu barədə  AZCON Holding-ə daxil olan “Aztelekom” MMC məlumat yayıb. 

Hesabat dövründə bölgədə 4 308 yeni abunəçi — ev təsərrüfatları və biznes subyektləri — şəbəkəyə qoşulub. Müqayisə üçün, ilkin mərhələlərdə əsas diqqət magistral xətlərin çəkilişinə yönəlmişdisə, son bir ildə birbaşa istifadəçi qoşulmaları ön plana çıxıb.

Şirkət bildirib ki, bölgədə quraşdırılmış 25 OLT (Optik Xətt Terminalı) avadanlığı vasitəsilə GPON texnologiyası tətbiq olunur. Bu texnologiya əvvəlki mis əsaslı şəbəkələrlə müqayisədə daha yüksək ötürmə sürəti və dayanıqlıq təmin edir.

Qarabağ regionu üzrə 2025-ci il üçün planlaşdırılmış mərhələ çərçivəsində 25 magistral xəttin tikintisi tamamlanıb. Təxminən 1 000 kilometr uzunluğunda fiber-optik magistral şəbəkə regionda rabitə infrastrukturunun əsas dayağı kimi çıxış edir və gələcək istifadəçi artımı üçün baza yaradır.

Aztelekom bildirir ki, növbəti mərhələlərdə əsas hədəf mövcud magistral şəbəkə üzərindən daha çox yaşayış məntəqəsinin və abunəçinin qoşulmasıdır. Bu da Böyük Qayıdış proqramı çərçivəsində bölgədə sosial-iqtisadi aktivliyin artmasına xidmət edir.

Gülnar