Deputat: Fermerlər üçün uzunmüddətli və aşağıfaizli kreditlər qanunla tənzimlənməlidir

Fermerlər üçün uzunmüddətli və aşağıfaizli kreditlərin verilməsi qanunvericiliklə tənzimlənməlidir. Bu barədə deputat Razi Nurullayev aqrar siyasət komitəsinin iclasında çıxışı zamanı bildirib.

Onun sözlərinə görə, kənd təsərrüfatında maliyyə resurslarına çıxış məhduddur və mövcud kredit şərtləri fermerlərin real imkanlarına uyğun gəlmir. Deputat vurğulayıb ki, bu məsələ ayrı-ayrı qərarlarla deyil, birbaşa qanunvericilik mexanizmləri ilə həll edilməlidir.

“Uzunmüddətli və aşağıfaizli kreditlər fermerlərin dayanıqlığını təmin edər. Bu istiqamətdə qanun qəbul olunarsa, çox müsbət nəticələr verə bilər”, – Nurullayev qeyd edib.

Deputat həmçinin aqrar sığorta sisteminin sadələşdirilməsinin vacibliyinə diqqət çəkib. Bildirib ki, iqlim dəyişiklikləri fonunda fermerlərin fəaliyyəti qısa müddətdə tamamilə məhv ola bilər və mövcud mexanizmlər riskləri yetərincə kompensasiya etmir.

Onun sözlərinə görə, elə bir aqrar model formalaşdırılmalıdır ki, fermerlər üçün qoruyucu və davamlı mexanizm rolunu oynasın.

Gülnar Nazimqızı