Ötən il İsraillə ticarət dövriyyəsi 360 milyon dollara çatıb

Azərbaycanın İsraildə səfirlik açmasından sonra iki ölkə arasında iqtisadi əlaqələr sürətlə genişlənib və 2025-ci ildə ticarət dövriyyəsi təxminən 50% artaraq 360 milyon dollara yaxınlaşıb. Bunu İsrailin xarici işlər naziri Gideon Saar bildirib.

Nazirin sözlərinə görə, Azərbaycan regionda mühüm siyasi mövqeyə və strateji coğrafi yerləşməyə malikdir və bu, ölkəni İsrail biznesi üçün Cənubi Qafqaz və Mərkəzi Asiyaya açılan əsas qapıya çevirir.

O qeyd edib ki, hazırda Bakı ilə Təl-Əviv arasında həftədə 20 birbaşa aviareys həyata keçirilir və İsrail tərəfi son iki il ərzində birbaşa uçuşları davam etdirən AZAL-ın fəaliyyətini yüksək qiymətləndirir.

Nazirin məlumatına görə, 2025-ci ildə 60 min İsrail vətəndaşı Azərbaycana səfər edib və bu göstəricinin növbəti illərdə əhəmiyyətli dərəcədə artacağı gözlənilir. O, israilliləri Azərbaycanın “təhlükəsiz və yəhudilər üçün dost ölkə” olduğunu vurğulayaraq ölkəyə səfərə çağırıb.

Çıxışında SOCAR-ın İsraildə Tamar yatağına etdiyi strateji investisiyaları da qeyd edən nazir bunun qarşılıqlı etimadın və praqmatik iqtisadi siyasətin göstəricisi olduğunu bildirib.

Nazir İsraildən 40-dan çox şirkət və iqtisadi qurum nümayəndəsinin daxil olduğu geniş biznes nümayəndə heyəti ilə Bakıya gəldiyini vurğulayıb. 

Nümayəndə heyətinə su, enerji, kibertəhlükəsizlik, texnologiya, səhiyyə, kənd təsərrüfatı və müdafiə sektorlarını təmsil edən şirkətlər daxildir.

İsrail rəsmisi bildirib ki, tərəflər müdafiə, enerji, su ehtiyatları, texnologiya və kibertəhlükəsizlik sahələrində qarşılıqlı investisiyaların artırılmasında maraqlıdır.

Gülnar Nazimqızı