PaşaBank 2026-cı ildə kredit portfelini 5-10% artıracaq

Bu il iqtisadi artım tempinin 4%-dən yüksək səviyyədə proqnozlaşdırılması bank üçün əlavə imkanlar yaradır. Bunu PaşaBank idarə heyətinin sədri və baş icraçı direktori Cavid Quliyev bildirib.

Onun fikrincə, bu dinamika kredit portfelinin 5–10% intervalında artırılmasına şərait yarada bilər.

Paşa Bank maliyyələşdirmə tələbatını davamlı şəkildə mövcud və potensial müştərilərlə aparılan danışıqlar əsasında qiymətləndirir. Bankda layihə axınının (pipeline) kifayət qədər güclü olduğu bildirilir. Müştərilərlə aparılan analiz və məsləhətləşmələr göstərir ki, xüsusilə qeyri-neft sektorunda maliyyələşməyə ehtiyac davam edir.

Bank rəhbərliyi qeyd edir ki, kredit portfelinin artımı makroiqtisadi dinamika ilə sıx bağlıdır. Qeyri-neft sektorunun ümumi iqtisadiyyatda payının genişlənməsi bank üçün yeni maliyyələşdirmə imkanları yaradır və bu tendensiyanın növbəti illərdə də davam edəcəyi gözlənilir.

Biznes modelinə gəldikdə, Paşa Bank korporativ və biznes bankçılığı istiqamətində fəaliyyətini davam etdirəcək. Bu sahədə strategiya dəyişməz qalır və əsas fokus real sektorun maliyyələşdirilməsi olacaq.

Eyni zamanda, Paşa Qrupuna daxil olan digər şirkətlərlə, o cümlədən Kapital Bank və qrupun ekosisteminə daxil olan qurumlarla sinerjinin gücləndirilməsi planlaşdırılır. Bankın təxminən 200 min fiziki şəxs müştərisinin bu ekosistemdən daha geniş şəkildə faydalanması strateji hədəflər sırasında yer alır.

N.Təbrizli