Parlament WUF13 ilə bağlı vergi güzəştlərini təsdiqləyib

Azərbaycanda 2026-cı ildə keçiriləcək Ümumdünya Şəhərsalma Forumunun 13-cü sessiyası ilə əlaqədar qeyri-rezident şəxslər üçün bir sıra vergi güzəştləri tətbiq ediləcək — qanun layihəsi parlamentdə son oxunuşda qəbul olunub.

Dəyişikliklər 2026-cı ildə Bakıda keçiriləcək Ümumdünya Şəhərsalma Forumunun 13-cü sessiyasının təşkili ilə bağlı vergi azadolmalarını nəzərdə tutur. Forumun ölkədə keçirilməsi üçün 2023-cü il dekabrın 22-də Azərbaycan hökuməti ilə BMT arasında ev sahibi ölkə sazişi imzalanıb və qanunla təsdiqlənib.

Qanuna əsasən, forum çərçivəsində fəaliyyət göstərən qeyri-rezident şəxslərə aşağıdakı vergi güzəştləri tətbiq olunacaq:

WUF13 üzrə işlərə cəlb edilən qeyri-rezident fiziki şəxslərin əldə etdiyi gəlirlər — gəlir vergisindən azad edilir, qeyri-maddi aktivlər və müəllif hüquqları üzrə qeyri-rezident hüquqi şəxslərə ödənilən royaltilər — mənfəət vergisindən azad olunur,  qeyri-rezident hüquqi şəxslərin iş və xidmətlərdən əldə etdiyi gəlirlər — mənfəət vergisindən azad edilir, qeyri-rezidentlər tərəfindən iş və xidmətlərin göstərilməsi, həmçinin təsdiqedici sənədlərlə malların idxalı — ƏDV-dən azad olunur.

Vergi güzəşt və azadolmaları müvafiq təsdiqedici sənədlər əsasında 2025-ci il 1 sentyabrdan başlayaraq bir il müddətinə tətbiq ediləcək.

Gülnar Nazimqızı