SOCAR və TotalEnergies “Abşeron” yatağının tammiqyaslı işlənməsini müzakirə edib

SOCAR ilə TotalEnergies arasında “Abşeron” qaz-kondensat yatağının tammiqyaslı işlənməsi məsələsi müzakirə olunub. Bu barədə SOCAR-dan bildirilib. 

Müzakirələr SOCAR-ın prezidenti Rövşən Nəcəf ilə “TotalEnergies” şirkətinin baş vitse-prezidenti Martina Oppizi arasında baş tutub. Görüş Cənub Qaz Dəhlizi Məşvərət Şurası və Yaşıl Enerji Məşvərət Şurası çərçivəsində keçirilib.

Tərəflər Azərbaycanın təşəbbüsü ilə icra olunan enerji layihələrinin, o cümlədən Cənub Qaz Dəhlizinin Avropanın enerji təhlükəsizliyində oynadığı rolu vurğulayıblar.

Görüşdə birgə həyata keçirilən layihələrin icra vəziyyəti, “Abşeron” yatağında əməliyyat fəaliyyətinin nəticələri və yatağın tammiqyaslı işlənməsi istiqamətində görülən işlər nəzərdən keçirilib.

Eyni zamanda enerji təhlükəsizliyi, rəqəmsallaşma, dayanıqlı inkişaf prioritetləri və qarşılıqlı maraq doğuran digər məsələlər ətrafında fikir mübadiləsi aparılıb.