Azərbaycanın strateji valyuta ehtiyatları 91 milyard dollara yaxınlaşıb

2025-ci il Azərbaycanın strateji valyuta ehtiyatları ilin əvvəlindən 14,1 milyard dollar və ya 20 faiz artaraq 85 milyard dolları keçib, hazırda isə təxminən 91 milyard dollar səviyyəsinə çatıb. Bunu baş nazir Əli Əsədov bildirib.

Baş nazirin sözlərinə görə, bu göstərici ÜDM-dən təxminən 12 faiz çoxdur və dünyada adambaşına düşən ehtiyatlara görə ən yüksək göstəricilərdən biri hesab olunur. O qeyd edib ki, strateji ehtiyatlar ölkənin xarici dövlət borcunu (4,8 milyard dollar) təxminən 18 dəfə üstələyir.

Əsədov həmçinin vurğulayıb ki, 2025-ci ildə inflyasiya hədəf diapazonunda qalıb. Belə ki, illik inflyasiya 5,2 faiz, orta illik inflyasiya isə 5,6 faiz təşkil edib.

Baş nazir əlavə edib ki, makroiqtisadi idarəetmənin keyfiyyəti maliyyə intizamı və fiskal dayanıqlılıq göstəricilərində də özünü göstərir. Onun sözlərinə görə, 2025-ci ildə dövlət büdcəsinin gəlirləri təxminən 39,2 milyard manat (illik müqayisədə 5,4 faiz çox), xərcləri isə 38,6 milyard manat ( 2,4 faiz artım ) səviyyəsində icra olunub.

Gülnar Nazimqızı