Ermənistan Azərbaycan üzərindən 26 min tondan çox mal idxal edib

Ermənistan 2025-ci ilin noyabrından 2026-cı il aprelin 15-dək Rusiya və Qazaxıstandan Azərbaycan ərazisi vasitəsilə 26 295 ton mal idxal edib. Məlumatı ölkənin Dövlət Gəlirləri Komitəsi və İqtisadiyyat Nazirliyi açıqlayıb.

Rəsmi məlumatlara görə, idxalın əsas hissəsini 24 865 ton buğda, 1 362 ton gübrə və 68 ton qarabaşaq yarması təşkil edib.

Bundan əlavə, 2025-ci ilin dekabrından 2026-cı il aprelin 15-dək Azərbaycandan Ermənistana Gürcüstan üzərindən dəmir yolu ilə 9 337 ton yanacaq idxal olunub. Bu həcmin ümumi gömrük dəyəri 7,2 milyon ABŞ dolları təşkil edib.

Yanacaq idxalının strukturunda 5 398 ton (4,3 milyon dollar) dizel və 3 939 ton (2,9 milyon dollar) benzin yer alıb.

Məlumata əsasən, malların Azərbaycan ərazisindən Ermənistan istiqamətində ilk dəmir yolu tranziti 2025-ci il noyabrın 6-da həyata keçirilib.

Ermənistan rəsmiləri qeyd edib ki, bu cür logistika marşrutlarının açılması regional əməkdaşlıq və sülh prosesinin iqtisadi nəticələrinin artıq hiss olunmağa başladığını göstərir və yeni inkişaf imkanları yaradır.

Aytac