Brent nefti 96 dolları keçib

Qlobal bazarlarda Brent markalı xam neftin qiyməti 6,3% artaraq bir barel üçün 96 dolları ötüb. Artım Yaxın Şərqdə geosiyasi gərginliyin yenidən yüksəlməsi fonunda qeydə alınıb.

Məlumata görə, İranın İslamabadda ABŞ ilə danışıqların ikinci mərhələsində iştirakdan imtina etməsi regionda qeyri-müəyyənliyi artırıb.

Eyni gün ABŞ Prezidenti Donald Trump bildirib ki, ABŞ hərbi-dəniz qüvvələri Hörmüz boğazında İran bayrağı altında üzən və blokadanı aşmağa cəhd edən yük gəmisini ələ keçirib.

Onun sözlərinə görə, USS Spruance gəmini saxlayaraq heyətə dayanmaq əmri verib. Gəmi heyəti bu çağırışa əməl etmədikdən sonra, ABŞ qüvvələri gəmini zərərsizləşdirərək hərəkətini dayandırıb.

Hörmüz boğazı dünya neft tədarükünün əhəmiyyətli hissəsinin keçdiyi strateji marşrutdur. Regionda baş verən hərbi və diplomatik gərginliklər qlobal enerji bazarlarında qiymətlərin kəskin dəyişməsinə səbəb olur. ABŞ və İran arasında davam edən qarşıdurma fonunda enerji bazarları yüksək volatillik nümayiş etdirir.

Gülnar Nazimqızı