Bayramov: Azərbaycan–Türkiyə ticarət dövriyyəsi $5,7 mlrd olub, hədəf $15 mlrddır

Azərbaycan və Türkiyə arasında ticarət dövriyyəsi 2025-ci ildə 5 milyard 720 milyon ABŞ dolları təşkil edib. Bu barədə Milli Məclisin deputatı Vüqar Bayramov bildirib.

Onun sözlərinə görə, Azərbaycan Türkiyə ilə ticarətdə 1 milyard 34 milyon dollar müsbət saldo əldə edib.

Deputat qeyd edib ki, iki ölkə arasında ticarət əlaqələri yüksək səviyyədədir və əsas hədəf bu göstəricini 15 milyard dollara çatdırmaqdır.

Bayramov vurğulayıb ki, Azərbaycanın xarici ticarət dövriyyəsinin 11,6%-i Türkiyənin payına düşür və bu, Türkiyəni İtaliyadan sonra ölkənin ikinci ən böyük ticarət tərəfdaşına çevirir.

Azərbaycan ixracında Türkiyənin payı 13,5%, qeyri-neft-qaz ixracında isə 16,5% təşkil edir.

Deputat əlavə edib ki, iqtisadi əməkdaşlıq yalnız ticarətlə məhdudlaşmır. İndiyədək Azərbaycan Türkiyə iqtisadiyyatına 20 milyard dollardan çox, Türkiyə isə Azərbaycana 18 milyard dollar sərmayə yatırıb.

O qeyd edib ki, dövlət başçıları səviyyəsində qarşılıqlı səfərlər strateji tərəfdaşlığın dərinləşməsinə töhfə verir və Azərbaycan Prezidentinin Türkiyəyə növbəti səfərinin ikitərəfli münasibətlərdə yeni mərhələ açacağı gözlənilir.

Gülnar Nazimqızı