Mərkəzi Bank: mövcud hüquqi baza lizinq bazarının inkişafını tam dəstəkləmir

Mövcud normativ-hüquqi baza maliyyə icarəsi, yəni lizinq fəaliyyətinin genişlənməsini və inkişafını tam dəstəkləmir. Bunu Mərkəzi Bankının sədr müavini Toğrul Əliyev Milli Məclisdə çıxışı zamanı bildirib.

Əliyev təqdimat zamanı deyib ki, qanunvericilikdə maliyyə icarəsini adi icarədən fərqləndirən əsas xüsusiyyətlər tam əksini tapmayıb. Onun sözlərinə görə, bu sahənin prudensial tənzimləmə və nəzarətdən kənarda qalması da lizinq verənlərin maliyyə bazarlarından əlavə resurs cəlb etməsini çətinləşdirir.

Sədr müavini qeyd edib ki, hazırda maliyyə icarəsi ilə banklar və bank olmayan kredit təşkilatları, eləcə də xüsusi icazə tələb olunmadığı üçün vergi qeydiyyatından keçmiş sahibkarlar məşğul ola bilir.

Bununla belə, praktikada bu fəaliyyətlə məşğul olan subyektlərin yalnız kiçik hissəsi həqiqətən lizinq xidməti göstərir və bu göstərici müxtəlif dövrlərdə ümumi sayın 5-10%-ni keçmir.

Əliyev əlavə edib ki, sahibkarlıq subyektləri qeydiyyatdan keçərkən maliyyə icarəsi ilə yanaşı digər oxşar fəaliyyət növlərini də seçdiyindən, bazarda təqdim olunan lizinq xidmətlərinin real həcmini və əhatə dairəsini müəyyən etmək çətinləşir.

Onun sözlərinə görə, qanun layihəsinin qəbulu maliyyə icarəsi xidməti göstərən təşkilatların reyestrdə qeydiyyatına, onların hesabatlarının Mərkəzi Banka, kredit məlumatlarının isə kredit bürosuna təqdim olunmasına imkan verəcək. Bu isə sektordakı real vəziyyətin daha aydın görünməsinə şərait yaradacaq.

Gülnar Nazimqızı