FAO rəsmisi: İqlim dəyişikliyi kənd təsərrüfatı üçün ən böyük risklərdən biridir

İqlim dəyişikliyi müasir dövrdə kənd təsərrüfatı sektorunun üzləşdiyi ən ciddi problemlərdən birinə çevrilib.
Bunu BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə Ofisinin rəhbəri Nasar Hayat “Risklərə qarşı Aqrar Sığorta Çətiri” konfransında çıxışı zamanı deyib.

Onun sözlərinə görə, fermerlərin fəaliyyəti təbiət hadisələrindən birbaşa asılıdır və iqlim dəyişiklikləri bu riskləri daha da artırır.

“Yağışlar, temperatur dəyişiklikləri, quraqlıq, eroziya, zərərvericilər və xəstəliklər fermerlərin gündəlik qarşılaşdığı əsas problemlərdir. Bu gün artıq iqlim dəyişikliyinin təsirlərini real həyatda yaşayırıq”, - Nasar Hayat bildirib.

O qeyd edib ki, son illərdə dünyada ekstremal hava hadisələrinin sayı əhəmiyyətli dərəcədə artıb və bu proses kənd təsərrüfatına ciddi təsir göstərir.

FAO rəsmisinin sözlərinə görə, fermerlərin iqlim risklərinə qarşı dayanıqlığını artırmaq üçün texnologiyaların tətbiqi, müasir metodlardan istifadə və investisiyaların təşviqi vacibdir.

“Fermerlər özlərini təhlükəsiz hiss etməlidirlər ki, kredit götürüb investisiya edə bilsinlər. Aqrar sığorta bu baxımdan mühüm mexanizmdir və kənd təsərrüfatının davamlı inkişafına dəstək verir”, - o vurğulayıb.

Nasar Hayat əlavə edib ki, iqlim dəyişiklikləri ilə bağlı çağırışlar eyni zamanda yeni imkanlar da yaradır və xüsusilə gənclərin innovativ yanaşmaları bu sahədə mühüm rol oynaya bilər.

Gülnar Nazimqızı