ABB yeni istiqraz emissiyalarını davam etdirməyi planlaşdırır, IPO investorlarının sayı artır

Azərbaycan Beynəlxalq Bankı (ABB) kapital bazarında aktivliyi artırmaq və kiçik investorları cəlb etmək məqsədilə yeni istiqraz emissiyalarını davam etdirməyi planlaşdırır, bankın idarə heyətinin sədri Abbas İbrahimov bildirib.

Onun sözlərinə görə, ABB-nin bu ilin əvvəlində bazara çıxardığı 5 milyon manatlıq istiqraz buraxılışına yüksək tələb qeydə alınıb və qısa müddətdə sifarişlər 50 milyon manatı ötüb.

“Burada məqsəd vəsait cəlb etmək deyil. Məqsəd kiçik və fiziki şəxs investorları kapital bazarına gətirməkdir”, – o deyib.

İbrahimov bildirib ki, bank növbəti istiqraz emissiyalarını mərhələli şəkildə həyata keçirməyi nəzərdə tutur və yeni buraxılışların may ayından davam etdirilməsi planlaşdırılır.

Onun sözlərinə görə, ABB 2024-cü ildə ölkədə ilk IPO həyata keçirərək minlərlə yeni investorun kapital bazarına daxil olmasına şərait yaradıb.

“IPO-dan sonra təxminən 2 min yeni investor bazara qoşuldu”, – o qeyd edib.

Bank rəhbəri bildirib ki, ABB hazırda Azərbaycanda səhmləri üzrə aktiv ikinci bazar formalaşdıran yeganə maliyyə qurumudur və son aylarda səhmlərin aylıq alqı-satqı həcmi təxminən 1 milyon manata çatıb.

İbrahimov əlavə edib ki, ABB həmçinin İslam maliyyə alətləri, o cümlədən sukuk emissiyası imkanlarını da nəzərdən keçirir. O bildirib ki, bu məhsulların tətbiqi qanunvericilik və bazar infrastrukturu ilə bağlı proseslərin tamamlanmasından asılı olacaq.

N.Təbrizli