Əfqanıstan Azərbaycan şirkəti ilə 20 milyon dollarlıq qızıl hasilatı müqaviləsi imzalayıb

Əfqanıstanın Mədən və Neft Nazirliyi Kunduz vilayətində yerləşən Qala-e-Zal qızıl yatağının işlənməsi üçün Azərbaycan və Əfqanıstan şirkətləri ilə 20,24 milyon dollarlıq müqavilə imzalayıb.

Nazirliyin məlumatına görə, beş illik saziş Azərbaycanın Reef Group LLC və Əfqanıstanın Subhan Momand Company şirkətləri arasında bağlanıb. Layihə təxminən 6 kvadrat kilometr ərazini əhatə edir. 

Müqaviləyə əsasən, şirkətlər hasilatdan əldə olunan gəlirin 30%-ni royalti kimi ödəyəcək, həmçinin sosial layihələr və yerli inkişaf proqramları üçün əlavə 200 min dollar ayıracaqlar. 

Nazirlik layihənin birbaşa və dolayı yolla təxminən 100 iş yeri yaradacağını bildirib. İmzalanma mərasimində Azərbaycan və Qırğızıstan səfirləri iştirak edib.

N.Təbrizli