Bakı–Türkmənbaşı marşrutu üzrə yeni gəmi Xəzərdə üzməyə başlayıb

Bakı və Türkmənbaşı limanları arasında konteyner daşımalarını həyata keçirəcək yeni gəmi Xəzər dənizində fəaliyyətə başlayıb. Azərbaycan Dəmir Yolları sədrinin müavini Arif Ağayev bildirib ki, gəminin istismara verilməsi yalnız yeni nəqliyyat vasitəsinin istifadəyə verilməsi deyil, həm də Azərbaycan və Türkmənistan arasında əlaqələrin daha da möhkəmlənməsi üçün mühüm addımdır.

“Bu tarixi gün münasibətilə bütün həmkarları və türkmən qardaşlarımızı təbrik edirəm. Bu gəminin suya buraxılması təkcə bir gəminin istehsalı və istismara verilməsi deyil, həm də əlaqələrimizin daha da sıx olması üçün bir işarədir”, — Ağayev deyib.

Onun sözlərinə görə, Orta Dəhliz artıq ciddi alternativ nəqliyyat marşrutuna çevrilir və bu dəhliz üzərində yerləşən ölkələr artan yük həcminə cavab vermək üçün öz infrastrukturunu təkmilləşdirməlidir.

Ağayev qeyd edib ki, Azərbaycan Dəmir Yolları və Bakı Beynəlxalq Dəniz Limanı da bu istiqamətdə infrastrukturun genişləndirilməsi üzrə işlər aparır.

“Dəmir yollarında əsas xətlər təkmilləşdirilir, yeni lokomotivlər alınır, parkımız yeni vaqon və platformalarla gücləndirilir. Bakı Limanında hazırda keçid qabiliyyəti 150 min TEU-dur. Aparılan dibdərinləşdirmə işləri və alınacaq yeni avadanlıqlar hesabına bu göstəricini yaxın dövrdə 260 min TEU-ya çatdıracağıq”, — o bildirib.

Ağayevin sözlərinə görə, Türkmənistan tərəfinin yeni gəmini istifadəyə verməsi artan yük axınları fonunda mühüm addımdır. O əlavə edib ki, hazırda daha bir gəminin istehsalı davam edir və onun növbəti üç ay ərzində istismara verilməsi gözlənilir.

N.Təbrizli