Azərbaycan Ukraynaya 11 enerji yardım paketi ayırıb

Azərbaycan Rusiyanın enerji infrastrukturuna hücumları fonunda Ukraynaya 11 enerji yardım paketi ayırıb. Bunu Ukraynanın energetika naziri Denis Şmıhal Bakı Enerji Həftəsində çıxışı zamanı bildirib.

Onun sözlərinə görə, Azərbaycan Ukraynaya generatorlar, transformatorlar, kabel məhsulları və digər kritik avadanlıqlar göndərib.

“Bu dəstək bizə ötən qışı keçirməyə kömək etdi. Bu gün isə növbəti qışa hazırlaşmağımıza yardım edir”, - Şmıhal bildirib.

Nazir qeyd edib ki, Rusiya Ukraynanın enerji infrastrukturunu hədəfə almaqla ölkədə sistemli böhran yaratmağa çalışıb, lakin Ukrayna bunun qarşısını ala bilib.

Şmıhal bildirib ki, Ukrayna enerji təhlükəsizliyinin yeni modelini formalaşdırıb. Bu model enerji obyektlərinin deyil, enerji funksiyalarının qorunmasına, sistemin daxilində dayanıqlığın yaradılmasına və regionlar, şəhərlər, xəstəxanalar və sənaye obyektləri səviyyəsində avtonom “enerji hüceyrələri”nin qurulmasına əsaslanır.

Onun sözlərinə görə, Ukrayna və Azərbaycan Avropanın qeyri-Rusiya qazı və neftinə çıxışının genişləndirilməsi istiqamətində birgə mühüm rol oynaya bilər.

“Trans-Balkan marşrutu vasitəsilə Xəzər qazı Avropanın enerji çatışmazlığı yaşayan regionlarına çata bilər. Azərbaycan qazının bu dəhliz üzrə ilk sınaq tədarükləri bu ideyanın reallığa çevrildiyini göstərir”, - Şmıhal deyib.

Nazir əlavə edib ki, Ukrayna təxminən 30 milyard kubmetr tutuma malik Avropanın ən böyük yeraltı qaz anbarlarını təklif edir.

Onun sözlərinə görə, bu əməkdaşlıq Azərbaycana etibarlı təchizatçı rolunu gücləndirməyə, Ukraynaya isə əsas tranzit və xidmət mərkəzi kimi mövqeyini möhkəmləndirməyə imkan verəcək.

N.Təbrizli