Kiril Temelkov: Bolqarıstan regional enerji bağlantılarını genişləndirməyə çalışır

Bolqarıstan Qara dəniz regionunda enerji təhlükəsizliyini gücləndirmək üçün yeni bağlantı layihələri üzərində intensiv işləyir və bu il ərzində texniki-iqtisadi əsaslandırmaya başlamağı planlaşdırır.
Bunu Bolqarıstan Respublikasının energetika nazirinin müavini Kiril Temelkov Bakı Enerji Forumunda bildirib.

Onun sözlərinə görə, layihə Gürcüstandan Rumıniyaya uzanacaq Qara dəniz sualtı elektrik kabeli layihəsini tamamlayıcı xarakter daşıyır.

Temelkov qeyd edib ki, Bolqarıstan “Şərq-Qərb dəhlizi” adlı iri interkonnektor layihəsini də irəli sürüb. Layihə Bolqarıstanı İtaliya və Qərbi Balkan ölkələri ilə birləşdirməyi, regionda elektrik enerjisi mübadiləsini artırmağı hədəfləyir.

“Bolqarıstan istehlak etdiyindən daha çox enerji istehsal edir. Ölkənin interkonnektivliyi ən aşağı istehlak səviyyəsindən iki dəfədən çoxdur. Biz qonşularla bağlantıları daha da artırmaq siyasətini davam etdirəcəyik”, - Temelkov bildirib

Gülnar Nazimqızı