Süni intellekt qaz tələbatının artımını sürətləndirə bilər

Süni intellekt və məlumat emalı mərkəzlərinin (data center) sürətli inkişafı qlobal qaz tələbatının artım tempini gözləniləndən daha yüksək səviyyəyə qaldıra bilər. Bunu SOCAR prezidenti Rövşən Nəcəf Bakı Enerji Həftəsi çərçivəsində keçirilən panel müzakirəsində bildirib.

Nəcəfin sözlərinə görə, hazırda qaz tələbatının gələcək artımını dəqiq proqnozlaşdırmaq çətindir, çünki süni intellekt texnologiyalarının enerji istehlakına təsiri hələ tam qiymətləndirilməyib.

“Mən hesab edirəm ki, qaz tələbatının artımı ildə 1%-dən çox olacaq. Süni intellekt həyatın bütün sahələrinə nüfuz edəcək və bu, daha çox hesablama gücü, nəticədə isə daha çox enerji tələbi deməkdir”, - Nəcəf bildirib.

O qeyd edib ki, enerji sektoru qarşıdakı illərdə baz yükünün təmin edilməsi ilə bağlı çağırışlarla üzləşəcək və atom energetikasının inkişafı ilə bağlı qəbul olunacaq qərarlar qaz bazarına da təsir göstərəcək.

“Bu artım hətta 2%-dən də yüksək ola bilər. Çox şey növbəti beş-altı ildə qəbul ediləcək siyasi qərarlardan asılı olacaq”, - SOCAR rəhbəri deyib.

Nəcəf əlavə edib ki, neft-qaz sənayesi uzun illərdir kifayət qədər investisiya cəlb etmir və artan tələbat fonunda bu məsələnin həlli vacib olaraq qalır.

N.Tebrizli