“Şahdəniz”də illik qaz hasilatı 27 milyard kubmetr təşkil edir

Hazırda Azərbaycanın ən böyük qaz yatağı olan “Şahdəniz”də illik qaz hasilatı 27 milyard kubmetr, kondensat hasilatı isə gündəlik 80 min bareldən çox təşkil edir.

Bu barədə yatağın texniki operatoru olan BP-Azerbaijan məlumat yayıb.

Şirkətin məlumatına görə, hasilat “Şahdəniz-1” və “Şahdəniz-2” layihələri çərçivəsində həyata keçirilir.

“Birinci mərhələ də nəzərə alınmaqla, hazırda yataq üzrə ümumi hasilat ildə 27 milyard kubmetr qaz və gündəlik 80 min bareldən çox kondensat təşkil edir”, – məlumatda deyilir.

BP bildirib ki, təkcə “Şahdəniz-2” layihəsi çərçivəsində hər il təxminən 17 milyard kubmetr qaz hasil olunur.

Mövcud istehsal gücləri yataqda gündəlik 76 milyon kubmetrdən çox, illik isə 28 milyard kubmetrdən artıq qaz hasil etməyə imkan verir.

“Şahdəniz” üzrə Hasilatın Pay Bölgüsü Sazişi 4 iyun 1996-cı ildə Bakıda imzalanıb və həmin ilin 17 oktyabrında Milli Məclis tərəfindən ratifikasiya olunub.

Layihədə iştirak payları belə bölünür: BP (operator) – 29,99%, LUKOIL – 19,99%, TPAO – 19%, NICO – 10%, Cənub Qaz Dəhlizi QSC – 16,02%, MVM – 5%.
 

N.Təbrizli