AIIB beş ildə kreditləşməni iki dəfə artırmağı planlaşdırır

Asiya İnfrastruktur İnvestisiya Bankı növbəti beş ildə kreditləşməni iki dəfə artırmağı və yaşıl, rəqəmsal infrastruktura dəstəyi genişləndirməyi planlaşdırır. Bunu bankın vitse-prezidenti və korporativ katibi Şerard Kauper-Koulz bildirib.

Onun sözlərinə görə, ötən il bankın kredit portfelinin 70%-i yaşıl layihələrə yönəlib. Kauper-Koulz əlavə edib ki, AIIB-in hazırda 111 üzvü var və Afrika, eləcə də Latın Amerikasından bir sıra ölkələr banka qoşulmaq istəyir.

O bildirib ki, bəzi ölkələrdə rəsmi inkişaf yardımının azalması fonunda inkişaf bankları qarışıq maliyyələşdirmədən istifadə etməli, özəl kapitalı səfərbər etməli və rəqəmsal maliyyəni genişləndirməlidir.

Kauper-Koulz qeyd edib ki, infrastruktur yalnız yollar, limanlar və körpülərdən ibarət deyil, həm də müasir iqtisadiyyatları dəstəkləyən rəqəmsal, səhiyyə və təhsil infrastrukturlarını əhatə edir.

O əlavə edib ki, AIIB İslam İnkişaf Bankı, Asiya İnkişaf Bankı, Dünya Bankı və Avropa Yenidənqurma və İnkişaf Bankı ilə əməkdaşlığa hazırdır və layihələrin hazırlanmasından icrasına qədər texniki dəstəyi artıracaq.

N.Tebrizli