ADY Bakı-Tbilisi qatarları üzrə bilet satış müddətini 90 günə qədər artırmağı planlaşdırır

“Azərbaycan Dəmir Yolları” (ADY) Bakı-Tbilisi-Bakı marşrutu üzrə biletlərə yüksək tələbat fonunda aktiv satış müddətini hazırkı 30 gündən 90 günədək artırmağı planlaşdırır. Bunu ADY-nin Sərnişin daşımaları departamentinin rəisi Azər Fərəcov bildirib.

Onun sözlərinə görə, marşrut üzrə biletlər satışa çıxarıldıqdan qısa müddət sonra tükənir.

“Yaxın günlərdə aktiv bilet satışı dövrünün 30 gündən 90 günə qədər artırılması mexanizmini tətbiq etməyi planlaşdırırıq”, - Fərəcov deyib.

O bildirib ki, iyunun 11-dən etibarən marşrut üzrə qatarlara əlavə vaqonlar qoşulub və satışa əlavə biletlər çıxarılıb.

Fərəcovun sözlərinə görə, mayın 21-dən bəri Bakı-Tbilisi-Bakı istiqaməti üzrə təxminən 20 min bilet satılıb ki, bunun da 5 minə yaxını kassalar vasitəsilə reallaşdırılıb.

ADY turizm şirkətlərinə və ya vasitəçilərə hər hansı kvota ayırmır və bütün biletlər kassalar, rəsmi sayt və mobil tətbiq vasitəsilə vahid sistem üzərindən eyni vaxtda satışa çıxarılır.

Şirkət rəsmisi bildirib ki, eyni şəxs öz adına bir reys üçün iki bilet ala bilməz və hazırda biletlərin kütləvi şəkildə alınaraq sonradan satıldığını təsdiq edən fakt yoxdur.

N.Təbrizli