AMB sığorta bazarının gələcək inkişaf istiqamətlərini müəyyənləşdirir

Azərbaycan Mərkəzi Bankı sığorta sektorunun növbəti inkişaf mərhələsini əhatə edəcək yeni strateji sənəd hazırlayır. Bu barədə Mərkəzi Bankın sədrinin birinci müavini Əliyar Məmmədyarov XI Azərbaycan Beynəlxalq Sığorta Forumunda çıxışı zamanı məlumat verib.

O bildirib ki, indiyədək əldə edilən nailiyyətlər əhəmiyyətli olsa da, qarşıdakı dövrdə sektorun daha da təkmilləşdirilməsi üçün geniş hədəflər müəyyən olunub. Hazırda həmin məqsədləri özündə əks etdirən yeni inkişaf strategiyası üzərində iş aparılır.

Əliyar Məmmədyarovun sözlərinə görə, yeni mərhələdə risk əsaslı nəzarət mexanizmlərinin tam tətbiqi, hadisələrə sonradan reaksiya verən modeldən qabaqlayıcı nəzarət sisteminə keçid, xüsusi tənzimləmə rejiminin əhatə dairəsinin artırılması və takaful da daxil olmaqla alternativ sığorta həllərinin bazara inteqrasiyası prioritet istiqamətlər olacaq.

Bununla yanaşı, strategiyada sığorta xidmətlərindən istifadə edən vətəndaşların hüquqlarının daha effektiv qorunması, xidmət keyfiyyətinin yüksəldilməsi və rəqəmsal texnologiyaların tətbiqinin sürətləndirilməsi də əsas yer tutur.

AMB rəsmisi vurğulayıb ki, nəzərdə tutulan tədbirlər risklərin idarə edilməsini təkmilləşdirəcək, yeni məhsulların yaradılmasını təşviq edəcək və bazarın institusional imkanlarının daha səmərəli istifadəsinə şərait yaradacaq.
 

Aytac